Ilaignar Muzhakkam

 

நாடாளுமன்ற தாக்குதலும்… வேலையின்மை அரசியலும்…

பாலுக்கு ஏங்கும் குழந்தை

கல்விக்கு ஏங்கும் மாணவர்

வேலை தேடும் இளைஞர்

பசியால் வாடும் மனிதர்

 

இவர்கள் எல்லாம் இல்லாத இந்தியாவே சுதந்திர இந்தியா என பகத்சிங்கும் அவரின் தோழர்களும், பிரிட்டிஷ் ஏகாதிபத்தியத்திடமிருந்து, இந்திய விடுதலை குறித்த எதிர்பார்ப்பை பதிவு செய்தனர். அப்படியான சமூக அமைப்பு உருவாவதிலேயே அனைவரும் கவனம் செலுத்த வேண்டும் என அழுத்தமாக குறிப்பிட்டனர். இந்த கருத்தியல் பிரச்சாரம் உலகம் முழுவதும் இளைஞர்களால் முன்னெடுக்கப் பட்டது. அதற்கான விசால பார்வையை, சோவியத் யூனியன் பின்பற்றிய சோசலிச கொள்கை உலக இளைஞர்களுக்கு வழங்கியது. முதலாளித்துவ நாடுகள், தங்கள் நாடுகளில் இளைஞர்கள் புரட்சிகர பணிகளில் இறங்கி விடக் கூடாது என அஞ்சினர். அதற்காக ஜான் மோனார்ட் கெயின்ஸ் நலத் திட்ட பொருளாதார கொள்கையை முதலாளித்துவ அரசுகள் பின்பற்றுவதன் மூலமே, குறைந்த பட்சம் தங்கள் நாட்டின் இளைஞர்களை புரட்சிகர அரசியலுக்கு செல்லாமல் கட்டுபடுத்த முடியும் என வழிகாட்டினார்.

பகத்சிங் மற்றும் தோழர்களின் எதிர்பார்ப்பை இந்திய ஆட்சியாளர்கள் எப்போதோ கைவிட்டு விட்டனர். ஜான் மோனார்ட் கெயின்ஸ் ன் வழிகாட்டுதலை ஏகாதிபத்திய உலகமயமாக்கல் கொள்கை, மாற்று அரசியலின் அழுத்தம் இல்லை என்பதால் கைவிட்டது. விளைவு இன்றைய வேலையின்மை, கல்வி வணிகம், அத்தியாவசிய பொருள்களின் விலை உயர்வு, பசி, பட்டினி சாவுகள் ஆகிய பிரச்சனைகள் மேலதிகமாக முன்னுக்கு வந்து மக்களை வாட்டி எடுக்கிறது.

கார்ப்பரேட் அரசியல் அமலாக்கம்:

நாடாளுமன்றங்கள் மக்களுக்காக செயல்படுவதை விட, கார்ப்பரேட் முதலாளிகளுக்காக செயல்படுவது மிக மிக அதிகம். இதை ஏழை மக்கள் மீதான புயலின், ரெட் அலெர்ட் என குறிப்பிடலாம். இதை அம்பலப்படுத்துவதில் இடதுசாரிகள் வெளிப்படுத்தும் தீவிரத்தை, இதர ஜனநாயக சக்திகள் வெளிப்படுத்துவதில்லை. நெல்லுக்கு பாயும் நீர் ஆங்கே புல்லுக்கும் புசிந்தோடுமாம், என்பதைப் போல், முதலாளிகளுக்கான சலுகைகளில் வழிந்தோடும் சிறு பகுதி தான் வேலைவாய்ப்பாக காட்சி படுத்தப் படுகிறது. வேளாண் சட்ட திருத்தங்களை எதிர்த்த ஓராண்டு முற்றுகைப் போர், தொழிற்சங்கங்கள் தொடர்ந்து நடத்தும், வேலைநிறுத்தங்கள் ஆகியவை, பாதிக்கப் பட்ட மக்களின் கலகக் குரல். இது சமூக அமைப்புகளின் குரலாக பிரதிபலிக்கவில்லை.

ஓராண்டு நீடித்த போராட்டங்களை அரசியல் இயக்கங்களில் இடதுசாரி கட்சிகள் கடந்து களத்தில் ஆதாரிக்க ஆளில்லை. ஆதரவு இயக்கங்களும் இல்லை. ஆனாலும் உறுதியான போராட்டம் அளித்த அழுத்தம் பாஜக ஆட்சியை சற்று பின்வாங்க செய்திருக்கிறது. அரசியல் அழுத்தமாக வடிவம் பெற்று இருந்தால், ஒருவேளை அது மாற்று கொள்கைக்கான தேடலை உருவாக்கி இருக்கும். இடதுசாரி கட்சிகள் ஓரளவு முன்னெடுத்தாலும் அந்த மாற்று கொள்கைகள், குறிப்பிட்ட பகுதிக்குள் நின்று விட்டது. மாற்று கொள்கைகள் மீதான பிரச்சாரம் சம்மந்தப் பட்ட கூட்டு இயக்கங்களாலும், தொழிற்சங்க அமைப்புகளாலும் பேசப் பட்டது. ஆனால் வேளாண் சட்டங்கள் திரும்ப பெறப் படும் என்ற அறிவிப்பு வந்த பின் தொடரவில்லை. இதன் விளைவு தான், 2022 மார்ச் மாதம் நடந்து முடிந்த உத்திர பிரதேச மாநில தேர்தல் முடிவுகள். அது பாஜக விற்கு சாதகமாக மாறியது.  இது ஒருபகுதி இளைஞர்கள் மத்தியில் அதிருப்தியையும், விரக்தியையும் உருவாக்கியது. இதன் மூலம் சமூக திரட்டுதல் பணிகளில் நம்பிக்கை இழப்பை உருவாக்கி இருப்பதும் உண்மை தான். இந்த நம்பிக்கை இன்மையைத் தான் முதலாளித்துவம் விரும்புகிறது.

உலக அளவில், எண்ணற்ற புரட்சியாளர்கள் இருந்தாலும், சே குவேரா புரட்சிகர அரசியலுக்கான அடையாளமாக, இளைஞர்கள் மத்தியில் அங்கீகரிக்கபட்டுள்ளார். அதேபோல் இந்தியாவிலும் பலர் இருந்தாலும் பகத்சிங் மற்றும் அவரின் தோழர்கள் பெரும் உத்வேகம் அளிக்கும் அடையாளமாக உள்ளனர். உலகமயமாக்கல், தாராளமயமாக்கல் கொள்கைகளின் வணிகமயத்தில், சே குவேரா வை கரைக்க முயற்சித்து வருகின்றனர். இந்தியாவில் அண்மையில் நாடாளுமன்றத்தில் நடத்திய தாக்குதல் மூலம், பகத்சிங் மற்றும் அவரின் தோழர்களின் அரசியலை சிறுமைப் படுத்தி உள்ளனர். இது புரட்சிகரமான அரசியல் செய்ய ஆர்வம் செலுத்துவோரை குழப்பும் நோக்கம் கொண்டது.

ஏற்கனவே அர்பன் நக்சலைட் என்ற சொல்லாடல் மூலம், கம்யூனிச அரசியலை கொச்சைப் படுத்தும் பணியை பாஜகவின் வகுப்புவாத சித்தாந்தம் செய்து வருகிறது. தற்போது நாடாளுமன்றத்தில் இளைஞர்கள் நடத்திய ஒரு தாக்குதலை முன்வைத்து, பகத்சிங் ரசிகர் குழு என பெயர் சூட்டப் பட்டு விவாதிப்பது, அர்பன் நக்சலைட் என்ற தாக்குதலின் அடுத்த கட்டம். இதன் மூலம் பாஜகவின் வகுப்புவாத அரசியல் மற்றும், உலகமயமாக்கல், தாராளமயமாக்கல் கொள்கைகளுக்கான மாற்று, கம்யூனிசம் முன் வைக்கும் சோசலிச கொள்கை என்பது உறுதியாகிறது. எனவே சோசலிச கொள்கைகளின் அடையாளமாக உள்ள மாவீரர்கள் மற்றும் அவர்களின் அரசியல் செயல் பாடு, சிறுமைப் படுத்தப் படுகிறது.

தேவை வேலையின்மைக்கு எதிரான வலுவான பிரச்சாரம்:

வேலையின்மை முதலாளித்துவத்திற்கு மிக அவசியத் தேவையாக உள்ளது. மூலதன குவிப்பில் வேலையின்மை கணிசமான பங்களிப்பை செய்கிறது. வேலையில் இருப்போரின் கூட்டு பேர உரிமையை கட்டுப்படுத்தும் ஆயுதமாக வேலையின்மை உள்ளது. வேலையில் இருப்போருக்கு எதிராக வேலையில்லாதோரை நிறுத்தி, முதலாளித்துவம் குளிர் காய்கிறது. காரல்மார்க்ஸ் வேலையில்லா பட்டாளத்தை, சேமநலப் படை என குறிப்பிடுகிறார். அந்த ரிசர்வ் ஆர்மியை முதலாளித்துவம் தன் தேவைக்கு பயன்படுத்துகிறது என்கிறார். இந்திய கம்யூனிஸ்ட் இயக்கத்தின் தலைவர்களில் ஒருவரும், விடுதலைப் போராட்ட வீரருமான பி.டி.ரணதிவே, வேலையில்லாதோரையும் திரட்ட வேண்டிய பொறுப்பு தொழிற் சங்கத்தினருக்கு உள்ளது எனக் கூறுகிறார். மேற்படி இருவருடைய விவாதங்களும், கார்ப்பரேட் மூலதனம் வேலையின்மையை பயன்படுத்தி கொள்ளும் ஆபத்தை வெளிப்படுத்துவதாகும்.

வேலையின்மையை வகுப்புவாதம், சாதி, உள்ளிட்ட அடையாளங்கள் இன்று பயன்படுத்தி வருவதை நாம் பார்க்கிறோம். மோதலுக்கு இரையாக இளைஞர்களை அவர்களின் அடையாள பெருமைகள் கூறி திரட்டிவந்த இந்துத்துவா வகுப்புவாத அரசியல், இப்போது, அதற்கு மாற்றான அரசியலின் அடையாளத்தை சிதைக்கும் வேலையில் ஈடுபட்டு வருகிறது. ஒருபுறம் பகத்சிங் நினைவு தினம், பிறந்த தினங்களில் பாஜக தலைமை ஈடுபட்டு கொண்டே, மற்றொரு புறம் அவரின் கொள்கைகளை சிறுமை படுத்துவதன் மூலம் நீர்த்து போகச் செய்கிறது. அதன் விளைவு தான் அண்மையில் நடந்த நாடாளுமன்ற தாக்குதல்.

அந்த தாக்குதல் மூலம் இருமுனை தாக்குதலை இடதுசாரி இளைஞர்கள் மீது முன் வைத்தது மேலும் ஒரு உதாரணம். ஒன்று டி.ஒய்.எப்.ஐ மற்றும் எஸ்.எப்.ஐ பயன்படுத்தும் பகத்சிங் என்ற புரட்சிகர அடையாளத்தை சிதைத்தது. இரண்டு இந்திய மாணவர் சங்கத்தின், மைசூர் மாவட்ட தலைவர் விஜயக்குமார்  பேசுவது போல் உள்ள புகைபடத்தை சில மணி நேரங்களில் பாஜகவின் தொழில் நுட்பகுழுவினர், நாடாளுமன்ற தாக்குதலில் ஈடுபட்ட மனோரஞ்சன் என்பவரின் புகைப்படத்துடன் இணைத்து அரசியல் செய்தது.

மேற்படி இரண்டும் இன்றைய முதலாளித்துவத்திற்கும், இந்துத்துவா கார்ப்பரேட்டிற்கும் இடதுசாரி சிந்தனை கொண்ட இளைஞர்களும், அவர்களின் அமைப்புகளுமே சவாலாக உள்ளதாக கருதுகின்றனர். முதலாளித்துவம் உருவாக்கும் தலைமுறைக்கு எதிரான கருத்தியல் ரீதியில் அதே இளைய தலைமுறையை உருவாக்கும் வலிமை, இடதுசாரி அரசியலுக்கு இருக்கும் காரணத்தினால், மேற்படி சித்தரிப்புகளை பாஜகவும், கார்ப்பரேட் இந்துத்துவா வும் முன்னெடுத்துள்ளது.

இந்த கட்டுரையின் முகப்பில் குறிப்பிட்டவாறு, சோசலிசத்தை எதிர் கொள்ள, ஜான் மொனார்டு கெயின்ஸ் என்ற நபர் முன்மொழிந்த திட்டம், லாபத்தையும், மூலதன குவிப்பையும் கட்டுபடுத்தியது. இன்று சோசலிச சமூக அமைப்பு பின்னடைவை சந்தித்துள்ள நிலையில், மூலதனம் மற்றும் லாபத்தின் குவிப்பு அதிகரித்துள்ளது. இந்த லாப வேட்டை நீடிக்க, சோசலிசம் குறித்த கருத்துரைகளும், பரப்புரைகளும் அழிக்கப் பட வேண்டும் என முதலாளித்துவம் விரும்புகிறது. இந்த சமூக விதியின் போக்கை புரிந்து கொள்ளும் போதே நாம் நமக்கான இளைஞர்களை அரசியலாக திரட்ட முடியும். வேலையின்மை என்பது முதலாளித்துவ அரசியல். வேலையின்மையை பயன்படுத்தி கொள்வது இந்துத்துவா வகுப்புவாத அரசியல்.

CITU Seithi

 

அதானியும் பங்கு சந்தை கொள்ளையும் – மோடி மௌனம் ஏன்?

மின்சாரம், துறைமுகம், விமானம் என மொத்தமாக, இந்திய நிறுவனங்களை கைப்பற்றி கோலோச்சும் நபராக அதானி, வளர்ந்துள்ளார். எல்லாம் எடுத்து விட்டு, கொசுரு வழங்குவது போல், பங்கு சந்தை வழங்கப்பட்டு உள்ளது. அதில் நடந்த ஊழல் காரணமாக அதானியும், அவர் சகோதரர், வினோத் அதானியும் பெரும் கோடிகளுக்கு சொந்தம் கொண்டாடினர், என்பதை ஹிண்டன் பர்க் ஆராய்ச்சி நிறுவனம், கடந்த ஆண்டும், இப்போதும் வெளியிட்டு உள்ளது.

பங்கு சந்தைக்கும் தொழிலாளருக்கும் என்ன சம்மந்தம்? நாம் ஏன் அது குறித்து விவாதிக்க வேண்டும்? போன்ற கேள்விகள் வரக் கூடும். உண்மையில் தொழிலாளி வர்க்கம் ஒன்று பட்டு போராடி பெற்ற ஊதிய உயர்வு, பொதுத்துறை நிறுவனங்களில் பணிபுரியும் ஊழியர்கள் கணிசமாக அனுபவிக்க கூடியதாக உள்ளது. அதன் மூலம் பங்கு சந்தையில் முதலீடு செய்யும் வழக்கம் கணிசமான ஊழியர்களிடம் அதிகரித்து உள்ளது. அண்மையில் ஓய்வூதிய திட்டம் அறிவிப்பின் போதும், பிராவிடண்ட் பண்ட் தொகையை பங்கு சந்தைகளில் முதலீடு செய்வது குறித்தும் நடக்கும் விவாதங்கள் தொழிலாளரின் பணத்தை, பெரும் முதலாளிகள் கபளீகரம் செய்ய ஏதுவானதாக உள்ளது என்பதைக் கவனிக்க வேண்டும்.

நிதி மூலதன காலத்தில் பங்கு சந்தை:

தொழில் மூலதனத்தின் ஒரு பகுதியாகவே பங்குசந்தை மூலதனமும் உள்ளது. தொழில் மூலதனத்தை திரட்ட பங்குகள் விற்பனை என்பது வடிவமாக உள்ளது. இரண்டு சந்தர்ப்பங்களில் பங்குகள் விற்பனை சூடுபிடிக்கிறது. ஒன்று நிறுவனம் தனது பங்குகளை ஒரு பகுதி விற்று திரட்டும் நிதியை, வேறு ஒன்றுக்கு மூலதனமாக பயன்படுத்துகிறது. மற்றொன்று கடனை ஈடு செய்ய பிறருக்கு கடன் பத்திரங்கள் வழங்குவது என்ற நடைமுறை.

அண்மையில் நெய்வேலி நிறுவனம் தனது பங்குகளை தொழிலாளருக்கு விற்பனை செய்யும் தந்திரத்தை கையாண்டது. எல்.ஐ.சி தன் ஊழியர்களுக்கு ஐ.பி.ஒ (Initiatiating public offer) என்று குறிப்பிட்டு பங்குகளை விற்க ஏற்பாடு செய்தது. தற்போது ஹூண்டாய் கார் நிறுவனம் இந்தியாவில் அந்த பணியை துவக்கி உள்ளது. ஒரு பகுதி தொழிலாளர்களும், இது போன்ற பங்குகளை வாங்குவதன் மூலம், தன்னை நிறுவனத்தின் பங்குதாரராக கருதும் போக்கு அதிகரிக்கிறது. இது குட்டி முதலாளித்துவ குணமாகும்.

மற்றொரு புறம் நாடுகளின் நெருக்கடி பங்கு சந்தைகளில் ஏற்படும் ஏற்ற இறக்கங்கள், அதில் சில நபர்கள் செலுத்தும் ஆதிக்கம் சூறையாடல் ஆகியவற்றுடன் இணைந்திருக்கிறது. 1934 -35ல் இரண்டாம் உலகப் போருக்கு முந்தைய நிதி நெருக்கடி, பங்குசந்தையால் ஏற்பட்டது. அது நாடுகளின் நெருக்கடியாக மாறி உலகப் போர் வெடித்தது என்பது வரலாறு. 2008ல் அமெரிக்காவின் வால்ஸ்ட்ரீட் பங்கு சந்தை முறைகேடுகளால் மூச்சு தினறியது. நடுத்தர மக்கள் பெரும் திரளாக போராடினாலும், போனது போனதாக அமெரிக்க அரசு அறிவித்து, பங்கு சந்தை முதலீட்டாளர்களுக்கும், சேமித்து வைத்த பணத்தை இழந்தவர்களுக்கும் சிறு பகுதி இழப்பீடு வழங்கி சூதாடிகளை காப்பாற்றியது. சூதாடிகளை காப்பாற்ற, அமெரிக்கா உலக தொழிலாளர்கள் மீது பல கொள்ளை தாக்குதல்களை நடத்தி வருவது இன்றளவும் நீடிக்கிறது.

1990 களில் ஹர்சத் மேத்தா அதைத் தொடர்ந்து கேதன் தேசாய் போன்ற சூதாடிகள் எப்படி பங்குசந்தையை கொள்ளை அடித்தனர், என்பது பெரும் விவாதப் பொருள்களாக மாறியது. அரசியல் பெரும் புள்ளிகள் அன்றைய பிரதமர் பி.வி. நரசிம்மராவ் வரை அம்பலமாகினார். ஆனால் இன்று கௌதம அதானி பங்கு சந்தை ஊழலில் தீவிரமாக குற்றம் சுமத்தப் படுகிறார். பிரதமர் மோடி, அதானிக்கு மிக வேண்டப்பட்டவர். ஆர்.எஸ்.எஸ் இயக்கத்திற்கு மிக நெருங்கியவர். ஆனாலும் ஹிண்டன் பர்க் ரிசர்ச் நிறுவனம் அதானியின் பங்குசந்தை முறைகேடுகளை தொடர்ந்து அம்பலப் படுத்திய போதும், அதானி, மோடி இருவரும் பொதுமக்களால், நடுத்தர மக்களால் தீவிரமாக விமர்சிக்கப் படவில்லை. தண்டிக்கப்பட வேண்டும் என்ற எதிர்ப்பு வலுவாக நடத்த படவில்லை. தொழிலாளி வர்க்க அரசியல் இந்த எதிர்ப்பை தீவிரமாக்கும் போது தான், பொதுமக்கள் அரசியலாக மாறும்.

2023 லிருந்து இன்று வரை:

2023 ஜனவரியில் ஹிண்டர்ன்பர்க் ரிசர்ச் நிறுவனம், அதானி குறித்த குற்றசாட்டை முதலில் வைத்தது. அதில் மோரிசியஸ் தீவு வழியாக, கௌதம அதானியின் சகோதரர், வினோத் அதானி மூலம், அதானி குரூப் ஆப் நிறுவனங்களில் பங்கு முதலீடு செய்ததாக, வெளிநாடுகளில் இருந்து முதலீடு என பொய்யான தோற்றத்தை உருவாக்கி தனது செல்வாக்கை உயர்த்தியது, என்பது பிரதான குற்றச்சாட்டு ஆகும். இது 1.76 லட்சம் கோடி அளவில் மதிப்பு கொண்டதாகவும், குற்றம் சுமத்தியது.

மேற்படி குற்றச்சாட்டுகளுக்கு ஆளான, அதானி மீதும் அவர் நிறுவனங்கள் மீதும் நடவடிக்கை எடுக்க வலியுறுத்திய போராட்டங்கள் மற்றும் நாடாளுமன்ற உறுப்பினர்கள் எழுப்பிய விவாதங்கள் பெரும் புயலை கிளப்பியது. போராடிய நாடாளுமன்ற உறுப்பினர்கள் தற்காலிக பணி நீக்கம் செய்யப் பட்டனர்.  ஆனால் அதானி மீதும் பங்கு சந்தை நிர்வாகிகள் மீதும் நடவடிக்கை இல்லை. தொடர்ந்து மார்ச் 2023 ல் உச்சநீதிமன்றம் அளித்த வழிகாட்டுதல் படி, இந்திய பங்குசந்தை நிறூவனம் சுயேட்சையான விசாரணை மேற்கொண்டு, உரிய அறிக்கை தாக்கல் செய்ய கேட்டுக் கொள்ளப் பட்டது. அதுவும் முறையாக நடைபெறவில்லை. ஒரு கட்டத்தில் இந்திய பங்கு சந்தை நிறுவனம், மேற்படி விசாரணை பொறுப்பை கைவிட்டது.

இந்திய பங்கு சந்தை நிறுவனம் மடியில் கணத்துடன் இருந்த காரணத்தால், வழியில் பயத்துடன் செயல்பட்டதன் விளைவே, எந்த ஒரு விசாரணையும் முறையாக நடத்த வில்லை. மேலும் அதை பாதியிலேயே நிறுத்தவும் செய்தது. மடியில் இருந்த கணம் தான், தன்னாட்சி அந்தஸ்து கொண்ட, செபி என்ற இந்திய பங்குசந்தை நிறுவனத்தின் தலைவர் மாதவி பூச் ஆவார். இதை தற்போது மீண்டும் ஹிண்டன்பர்க் ரிசர்ச் நிறுவனம் அம்பலப்படுத்தி உள்ளது.

2015லிருந்தே அதானி தரப்பில், வெளிநாட்டில் இருந்து பங்கு முதலீடுகள் செய்வதாக கணக்கு காட்டி, ஏமாற்றி உள்ளனர். இதற்கு மாதவி பூச் மற்றும் அவர் இணையர் பூச் இருவரும் உடந்தையாக இருந்துளனர். பல காலகட்டங்களில் இவர்கள் என்னென்ன வகையில் அதானி நிறுவனத்திற்கு உதவியாக இருந்துள்ளனர் என்பதை, ஹிண்டண்பர்க் ரிசர்ச் நிறுவனம் பட்டியலிட்டுள்ளது. ஆனால் இன்று வரை மாதவி பூச் தனது பதவியை ராஜினாமா செய்யவில்லை.  ஒன்றிய பாஜக ஆட்சியாளர்களும் வாய் திறக்கவில்லை. பிரதமர் மோடி இது போன்ற ஊழல் மற்றும் முறைகேடுகளை திசை திருப்பும் வேலையை செய்து வருகிறார். பங்கு சந்தை உள்ளிட்ட நிதி நிர்வாக நடவடிக்கைகளுக்கு பொறுப்பான நிதியமைச்சர் நிர்மலா சீத்தாராமன் அவர்களும் வாய் திறக்கவில்லை.

அரசின் மௌனம் மற்றும் மாதவி பூச் உள்ளிட்டோரின் செயல்பாடுகள், அதானியின் சொத்து குவிப்பிற்கு மிகப் பெரிய அளவில் உதவக் கூடியதாக உள்ளது என்பதை வெட்டவெளிச்சமாக்குகின்றன. எனவே பங்குசந்தையில் நமக்கு நேரடி பங்கு இல்லை என்றாலும், பெரும் முதலாளிகள் பங்கு போட்டுக் கொள்ளை அடிப்பதை அனுமதிக்க கூடாது.